[Spellyans] SWF Review

Daniel Prohaska daniel at ryan-prohaska.com
Sat Feb 2 13:27:46 GMT 2013


Here's the same text based on the Late Cornish variant:

Amendya an Form Scrifys Savonek

(Ma an text awoles scrifys in FSS.DP/Diwedhes)

 

Ma prays meur dendelys gen Kescowethyans an Taves Kernowek drefen anjei dhe gollenwel an ober marthis a dharbary Fürv Scrifys Savonek a’n eth, a ell bos devnidhys alebma rag gen Consel Kernow ha gen corffow erel rag descans fürvek hag y’n bownans poblek dre vroas. Pur gales o an dever settyes dherag an Bagas Ad-Hoc hag y a spedyas ort y wül ajei dhe bemp dedh a vetyansow enep orth enep tredh mis Dü 2007 ha mis Meurth 2008. Apert ew y feu res dhedhans ervira maters tickly pan wrüg an eth den na garowlinya elvednow an Fürv Scrifys Savonek. Certan ew an bolitegieth dhe wary part broas e’n erviranjow ethidhek na, ha ken nag ew an spellyans üjon’jei o comendya, dh’agan tibyans nei, perfeth en pub poynt, ma ev o mos pell dhe güdha etto pub ehen a’n Eth Dasserhys, dhort savle a leveryans an Taves Dasvewys ha dhort savle pednrewlys an spellyans keffres.

 

Ma “Elvednow a’n Fürv Savonek a Gernowek” o ajon e vedh res gwül amendyanjow dhe’n Fürv Savonek “m’aller dhe well servya an odhobmow a Gernowegoryon a’n jedh hedhiw”. Pan eus dhe Gonsel Kernow ha dhe gorffow poblek erel letherednans a ell anjei gwül devnidh anodho, eth hevel dhe nei bos fowtys broas e’n Fürv Scrifys Savonek ha so na vedh hei mar blegadow rag ûsyans personek. Nag ew broas lowr whath “an niver a’n graffow hengovek provies rag scriforyon whensys dhe dhevnidhya spelyansow moy tradicyonal” dhe alowa tüs dhe scrifa herwedh ûsadow gwir hengovek an taves. Ha moy es hedna ma taclow e’n Fürv Savonek nag ew kesson an eyl gans y gila ha ma cabmdibyansow enny e’wedh.

 

Pan ero nei o leverel hebma nag eron nei o omsettya ort an Bagas Ad-Hoc, nag ort autours a “Elvednow an Fürv Scrifys Savonek a’n Taves Kernowek”, nag ort Kescowethyans an Taves. Ma spedyes ganjan’jei drei warbarth lies diffrans dredh aga ober hag ma anjei dhe wormel en vroas.

 

Et y raglavar dhe’n Avisyans a’n Fürv Scrifys Savonek Caderyer Kescowethyans an Taves Kernowek a laver bos “res a faster ha rag hedna na vedh an Fürv Scrifys Savonek chanjys bis pedn pemp bledhen”. Für ew an ervirans ma rag autoritas poblek.

 

Aves dhe gerhidnow sodhogel, ma cübmyas dhe Gernowegoryon heb mar scrifa en penag letherednans a wreffa moyha plegya dhedhans. Ajon hedna ha mires rag dhe’n amendyanjow a vedh gwres dhe’n Fürv Scrifys Savonek e’n process a’n Kescowethyans e’n termin a dheu, nei a gres bos res dalleth dadhla heb let veth adro dhe’n ownanjow hag adro dhe’n gwellheanjow a dal bos gwres dhe’n spellyans. E’n men termin, da via gena nei profya dhe’n bobel versyon a’n Fürv Scrifys Savonek a ell bos ûsys distowgh. Na wra nei crejy bos da desky taclow digesson ha taclow cabm, mar keller aga ajon ha’ga owna.

 

Rag esya dadhlans a’n par ma, dadhelva dre rivbost re beu formys, neb ew gelwys Spellyans. Nei a gres e coodh dadhel adro dhe dhasfürvya an letherednans bos egor dhe dhen veth a venja kemeres radn enny. Nei a gres e’wedh na vedh compes dhe dhen veth bos kevrednek y’n dhadhelva heb rei y hanow y honan.

 

E vedh an dhadhelva dadn demprans scav (Temprans ha Censorieth ew taclow dihaval. Mar pedh an dhadhel temprys, nei a ell bos certan e wra pubonan cowsel a daclow perthinek hag e vedh pubonan cortes et y eryow.) Mar menta cawas eseleth et agan mesk nei, res vedh dhis ûsya dha hanow gwir. Moy es hedna, mar pedh den degemerys vel esel, res vedh dhodho omacontya ha scrifa nebes lavarow dro dhodho y honan ha dro dhe’n taclow üjy a les dhodho. Purpos an dhadhelva ma ew dhe omgussülya en town adro dhe’n poyntys anperfeth et an Fürv Scrifys Savonek, ha dhe gomendya en pana vaner a ell anjei bos amendys. Ma entrans e’n Dhadhelva frank dhe geniver onan a vo whensys dhe omjunya genen, bes res vedh dhodho sevel ort “flamya”, ort omsettyans personek (na vedh leshenwin didhanüs alowys). Mar qura den veth defolya an rowl ma a gortesy, ev a vedh towlys mes. Na wra va cawas bes üdn gwarnyans.

 

An bagas a dhiloryon a wra omgussülya dro dhe amendyanjow hag ownanjow a alla bos gwres dhe’n FSS obma en Spellyans en üdnek. Na wra anjei aga dadhla en ken teller veth. Th ero nei o quettyas dadhel vew.


-------------- next part --------------
An HTML attachment was scrubbed...
URL: <http://kernowek.net/pipermail/spellyans_kernowek.net/attachments/20130202/039cdfaf/attachment-0001.html>


More information about the Spellyans mailing list