[Spellyans] (no subject)

Daniel Prohaska daniel at ryan-prohaska.com
Thu Aug 23 22:42:37 BST 2018


Nôtyans Ancow rag Albert Bock

Nos Wener diwettha e verwis en kerdh en tròbm o howeth da vy, Albert Bock. Thera vy o kil duwon rag o hòthman ha ma oll o prederow vy gen y garadowyon, en arbednik y wreg, Julia, ha'y dhew flogh wheg Tristan ha Salome.

My a dheuth warbydn Albert en 1994 pan vedha nei o stüdhya en Ûniversita Vienna. Nei a gemeras cors Kembrek warbarth ha nei a veu cowetha dhia nena. Thera dhen dispûtyansow gwresek adro dhe bolitegieth keffres ha cowsow marthek o tòchya minorites kenedhlek, stüdhyansow Keltek, sedhogow mûsik gen bagasow pobel a'n teller ha, heb mar, kevewiow gwyls. Ke ve gan fordhow galwansek gyllys ales, nei a veu en dadn tòch a'n eyl gen y gila der oll an bledhydnyow ha'gan kestav a gressyas pan eth Albert mellyes gen taclow a Dhasserghyans an taves Kernôwek. Vel Bretonegydh lettrys, e teudh Kernôwek en es dhodh'ev, ha'y gòdnik en gwel an stüdhyansow Keltek a veu drüdh dres ehen.

Albert a veu genys en Vienna an nownjegves a vis Dû 1974. Ev a stüdhyas yethydhieth kebmyn ha stüdhyansow Edhowek. Tû ves a'n tavosow môy lies deskys pecar'a Almaynek, Sowsnek ha Frenkek, ev a ôya ewedh Bretonek, Kernôwek, Yiddish ha Japanek mesk tavosow erel. E veu ev esel dhia'n dalleth a'n Fondyans rag Stüdhyansow Keltek a'n Ûniversita Vienna lebma wrüg e lenna Bretonek ha Kernôwek ha dyllo lies pâper war an maters agettep. My a wosôwas órt nebes y arethyow ha na ellam bes fastya dell veu e descador enowys gen fordh obery crev, en arbednik pan wrüg e dismygya manerow tyckly an tavosow Brythonek. Esel a'n dalleth a gowethas rag stüdhyansow Keltek, henwys Brennos, a veu ev ewedh. Ev a dhenaha en wresek hag argya ort an re na a venja gwil en cabm a'n stüdhyansow Keltek vel gwel kevrinek ha difres an deskybledh vel devnydh academik pòsek a yethydhieth, lien, istory, ha hendheskans warbydn arwedhyans an dòllweythoryon.

Albert, warbarth gen y gòthman Ben Bruch, a veu temprer an bagas Ad-Hoc, an bagas a worras warbarth en kensa rewlys rag an Fürv Scrifys Savonek en 2008. Y gonvedhes brâs a daclow o tòchya kemenethow bian ha sqwirheans tavosow, y skiens a dhothter hag assoylyansow heb flowj keffres ha'y gerenja rag an taves a weresas dhe'n bagasow Kernôwek dyffrans doas warbarth, neb na alja kens cawas kesassoylyans et an qwestyon a letherednans. Endella, gallas cadnas rag kesoberyans kerenjeek tredh an bagasow neb era o corvednes a'n eyl ort y gila. Esel Gorsedh Kernow a veu ev ewedh.

De Sadorn diwettha e whrüga vy kemeres skrüth pan wrüg gwreg Albert, Julia, scrifa war Facebook tho e gyllys stray ha gofyn ort cowetha a pe va gwelys en teller veth. Diwettha, nos Sadorn, hei a scrifas dr'o kevys y gorf gen an creslû ha'y vernans a veu tra sür ha trûedh. Albert a ladhas y hònan. Na ellam dismygya an peth üjy y garadowyon o codhav vel arsewnans. Na ella nei bes gwaytya dell wrüg enev Albert, hegar ha tormentyes, cawas an cres neb a whila. Bes hedna a dalvia dhen drei dh'agan cov oll ahanen a gollas caradow en omladhans assa ell boas medhel ha brottel bres a dhen, drei dh'agan cov gan bosa nei ena rag gan cowetha ha'gan teylûyow nei, hag avîsyes a'n feth, na as menowgh an düs neb üjy oth òmbla chalenjys an bownans mires bera dh'aga haletterow anjei ha'gan kemeres radn ettans. Nei a vedh kemeres hireth ankenjy warlergh Albert ha thera vy o rei o hescalarow vy dh'y deylû ha'y gowetha. Còsk en cres, sos.  
-------------- next part --------------
An HTML attachment was scrubbed...
URL: <http://kernowek.net/pipermail/spellyans_kernowek.net/attachments/20180823/d5750c96/attachment.html>


More information about the Spellyans mailing list